Наќе Чулев: Близок соработник на Назим Буши отворено на страната на Хамас
Поранешниот технички министер за внатрешни работи Наќе Чулев тврди дека близок соработник на заменик-министерот на МВР, Назим Буши, отворено застанал на страна на Хамас во ситуација кога Владата му дава поддршка на Израел.
„Во време кога светот и Македонија застануваат и даваат недвосмислена поддршка за Израел и ги осудуваат терористичките напади на Хамас, висок началник во Министерството за внатрешни работи дава јавна поддршка на нападите на Хамас врз Израел.
Имено, станува збор за Аднан Синани, началник во Одделот обезбедување во Министерството за внатрешни работи и лице кое работи како лично обезбедување на Заменик министерот за внатрешни работи, Назим Буши. Работа која вклучува ВИП обезбедување, учество во домашни и странски делегации и присуство на меѓународни настани.
Претходно, на социјалните мрежи тој имаше јавен пост во кој има недвосмислени елементи на говор на омраза што е кривично дело предвидено во Кривичниот закон“, напиша разузнавачот на социјалните мрежи.
Чулев прашува дали безбедносните проверки за ова лице се направени стручно и професионално со оглед на „високиот безбедносен ризик при обезбедување на домашни и странски ВИП личности и делегации“.
„Дали функционерите на ДУИ, како Бујар Османи, кој јасно го осуди нападот на Хамас врз Израел, се свесни дека нивен поддржувач има дијаметрално спротивни ставови, а чува нивни колеги од Владата како и претседателот на Собранието, Талат Џафери“, додава Чулев.
Тој побара став и од министерот за внатрешни работи Оливер Спасовски и претседателот Стево Пендаровски на овој, како што вели, анти-НАТО наратив на висок полициски службеник.
Слично
Поврзани вести
