Доколку барате идеално место за бегство од градската врева, ви предлагаме да го посетите верско-рекреативниот локалитет Три Круши, сместен во близина на Скопје.

Овој културно-верски центар, кој се издига над населбата Драчево, нуди спокој, чист воздух и импресивен поглед кон Скопската Котлина, како и кон планината Китка. Благодарение на својата местоположба, „Три Круши“ е совршена дестинација за еднодневен одмор, релаксација и лесни прошетки во природа, пишува Женски магазин.

Во срцето на локалитетот се наоѓа црквата Света Петка, која има особено значење за локалното население. До неа се издига голем крст кој навечер се осветлува и доминира над Драчево, создавајќи препознатлива глетка. Интересно е што во близина се наоѓа и стар камен крст, познат како „Корџев крст“, кој сведочи за долгата духовна традиција на ова место.

Просторот околу црквата е уреден со бројни клупи и маси, што го прави идеален за семејни излети и дружења. Дополнително, тука е изграден и амфитеатар со плато за културни настани, каде секое лето се одржува манифестацијата „Културно лето Три Круши“, привлекувајќи посетители од целата околина.

„Три Круши“ е место каде се спојуваат духовноста, природата и културата – вистинска мала оаза на мирот, достапна на само неколку километри од главниот град. Без разлика дали сакате тивка прошетка, поглед што одзема здив или момент на духовен мир, оваа дестинација нуди по нешто за секого.

РЖМ - Г.Д.Г
Фото: Википедија/ Патувања низ Македонија