Oглас за продажба на неизградено државно земјиште на вкупно осум парцели, објави денеска Општина Гевгелија.

Три од нив наменети за индивидуално домување во населбата „Караорман“ со површина од 700 до 725 метри квадратни ќе се понудат на продажба со почетна цена од 61 денар за метар квадрат. Почетната цена за парцелата за индивидуално домување кај „Касарната“ изнесува 943 денари, а парцелата за станбена зграда во центарот на градот ќе стартува со цена од 2.570 денари за метар квадратен.

Парцелите за производно-сервисен погон кај „Блокотехна“ и за стоваришта кај Негорци ќе се нудат по цена од 61 денар за метар квадратен.

Пријавите за учество за парцелите за индивидуално домување треба да се достават најдоцна до 1 октомври, а електронското наддавање ќе се одржи на 4 октомври. За станбената зграда во центарот на градот документите се доставуваат до 10 октомври, а лицитацијата ќе се одржи на 17 истиот месец. Потребната документација, пак, за производствено-сервисниот погон и за стовариштата ќе се прима до 7 октомври, а електронското наддавање е закажано за 14 октомври.