Томислав Тунтев, координатор на пратеничката група на СДСМ денеска изјави дека очекува убедлива победа на нивните кандидати за градоначалници и листи за советници на локалните избори на 15 октомври.

Тунтев вели СДСМ  е подготвен за локалните избори што по промената на централната власт, ќе донесат промени и на локално ниво. 

„Поддршката што граѓаните ја даваат на СДСМ и проектите што носат живот за сите, секојдневно расте. Тоа е видливо и од нашите секојдневни средби со граѓаните и од општата атмосфера на слобода што владее во изминатите два месеца. Со победата на СДСМ на претстојните локални избори, започнатиот процес на реформи и ослободување ќе продолжи и на локално ниво“- изјави Тунтев. 

ВМРО-ДПМНЕ и коалицијата „За подобра Македонија“ е целосно подготвена за настап на локалните избори, најави денеска пратеникот Антонио Милошоски. 

„Очекуваме со нашата програма и кадровска понуда да освоиме најголем број на гласови на локалните избори, најголем број на советници во споредба со другите политички партии и најголем број на градоначалници споредбено со другите политички коалиции“- вели Милошоски. 

По повод распишувањето на локалните избори, ЦИВИЛ – Центар за слобода уште еднаш потсетува на обврските на институциите и учесниците во изборната трка дека мораат до максимум да ги почитуваат демократските стандарди за спроведување слободни избори.