Македонскиот фудбал денеска загуби голем фудбалски работник во Марио Ѓурчиновски кој почина на 47-годишна возраст.

Последниот ангажман го имаше во Фудбалската федерација на Македонија (ФФМ), каде беше координатор за едукација на тренери.

ФФМ на Фејсбук се прости од Ѓурчиновски.

„Марио. Единствена и неизмерна љубов. Оставаш големо сведоштво за тоа каков е човекот со сета своја кршливост и сила. Ти благодариме за емоциите, за среќата, за твоето огромно срце кое никогаш нема да престане да чука. Ќе те сакаме засекогаш…
Фудбалската федерација на Македонија засекогаш ќе биде твојот дом. Твоите „слабости“, твоите „грешки“ се еднакви на твојата огромна големина. Благодариме Марио што си и ќе останеш со сите нас. Единствена и неизмерна љубов. Тагуваме за најголемиот професионалец во нашата куќа. Ѕвезден, неповторлив… Син, пријател, татко, сопруг, брат……Марио. Единствена и неизмерна љубов! Фудбалската федерација на Македонија и целото наше семејство ќе те сака засекогаш“, пишуваат од ФФМ. 

Поранешниот селектор на македонската фудбалска репрезентација Игор Ангеловски се прости од својот пријател Марио Ѓурчиновски кој почина денеска.

„Денес тагувам за еден голем професионалец Марио Ѓурчиновски со кој сум работел, почивај во мир пријателе. Емотивно сум вознемирен од денешната вест за твојата ненадејна смрт. Твојот хумор засекогаш ќе го паметам.“, напиша Ангеловски.