МВР СО ДЕТАЛИ ЗА НАПАДОТ ВРЗ НОВИНАРСКАТА ЕКИПА - насилникот е приведен и ќе следи поднесок
Полицијата излезе со детали за нападот на новинарската екипа за време на вчерашниот протест на ВМРО-ДПМНЕ.
Нападот е извршен од четириесет и едногодишниот А.И, кој замавнувал накај новинарката Милка Смилевска и и го бутнал микрофонот. Тој бил приведен во станица, по што ќе следи поднесок.
„На 09.09.2020 во 18.30 часот, М.С. пријавила дека на ул.„Македонија“, каде се одвивал протест, а таа била работно ангажирана како новинар, додека разговорала со едно од лицата кои учествувале на протестот, дошол А.И. (41) од Скопје и замавнувал со рацете, при што и го бутнал микрофонот. А.И. е приведен во полициска станица и по документирање на случајот ќе следи соодветен поднесок“, се вели во соопштението од полицијата.
Со реакција се јави и Советот за етика во медиумите на Македонија (СЕММ), кои го осудија нападот кон новинарската екипа на Ал Џезеира на протестот во Скопје, организиран од политичката партија ВМРО - ДПМНЕ.
„Новинарката Милка Смилевска и снимателот Јорде Ангеловиќ се нападнати додека ги извршувале своите професионални обврски, што е незамисливо во една демократија. Толеранцијата на вакви напади и спречувањето на медиумските работници да си ја вршат својата работа носи ризик тие да се повторат и да се засилат, со што не се загрозува само безбедноста на колегите, туку и елементарното право на граѓаните да бидат вистински информирани“, велат од СЕММ.
Затоа бараме, нагласуваат, од институциите итно расветлување на инцидентот и одговорност за напаѓачите, а од партиите поголема одговорност во спречувањето на говорот на омраза и делата што произлегуваат од него.
Слично
Поврзани вести
