МВР потврди: Обезбедувач на Назим Буши нападнал полицаец
МВР потврди дека припадник од обезбедувањето на заменик-министерот за внатрешни работи Назим Буши нападнал полициски службеник, но демантира дека не се превземени никакви дејствија. Од таму тврдат дека превземени се мерки против лицето С.С, кој бил приведен и против кој ќе има дисциплинска мерка. Од МВР никаде не споменуваат претепување, како што тврди разузнавачот Наќе Чулев, и од таму додаваат дека полицаецот единствено бил спречен да изврши службено дејство.
„Министерството за внатрешни работи најостро ги демантира невистините изнесени на социјалните мрежи од страна на Наќе Чулев односно ВМРО-ДПМНЕ за наводно непреземање на мерки во врска со напад врз полициски службеник од Единицата за интервентна полиција. Напротив, преземени се сите неопходни мерки. Осомничениот С.С. е приведен и со него е извршен службен разговор.
Одземен му е службениот пиштол и известен јавен обвинител, а против него ќе биде поднесена кривична пријава за сторено кривично дело спречување на службено лице при вршење на службено дејствие и ќе биде поведена дисциплинска постапка. Апелираме до Чулев и ВМРО-ДПМНЕ да престанат да шират лаги“, гласи демантот на МВР кој наедно е и потврда дека навистина имало инцидент.
Разузнавачот Наќе Чулев претходно побара од Министерството за внатрешни работи да преземе итни мерки за заштита на полициските службеници и го повика министерот Оливер Спасовски „да не го штити полициското подземје“.
„Денес, јавно го прашувам Оливер Спасовски и Министерството за внатрешни работи, дали е точно дека лице кое работи како обезбедување на висок функционер во оваа институција, нападнало припадник на интервентната полиција, кој завршил со тешки телесни повреди?
Воедно, го повикувам Оливер Спасовски да даде одговор, каде се случил конкретниот настан и зошто посочено лице – напаѓач во тој момент присуствувало на место каде пристап имаат лица со посебни овластувања?
Зошто Министерството за внатрешни работи, досега го крие посочениот настан и во ниту еден од полициските билтени не е споменат истиот? Дали е побарано надлежните служби да утврдат одговорност и ако тоа се потврди, дали Оливер Спасовски ќе побара разрешување на функционерот, чие обезбедување е тепачот?“, праша Чулев.
Слично
Поврзани вести
