Министерството е одлучнo во намерата да ја прекине претходната практика на неказнето напаѓање и попречување на новинари во извршување на нивните работни задачи, соопштија од МВР притоа во истиот контекст информирајќи ја јавноста дека  СВР Скопје по преземените мерки и активности во врска со вчерашниот настан (23.08.) кога пред ТЦ Бисер од страна на едно лице беа нападнати новинари од “НОВА ТВ“, го утврди идентитетот на напаѓачот.

Станува збор за А.Б. (38) од Скопје којшто најпрво го нападнал едниот новинар (со насилно однесување, туркање на телефонот со кој снимал и со влечење и виткање на раката) а потоа и другиот новинар, односно снимател (со удар во камерата со која снимал), додека тие биле на службена задача -  покривање на настан на граѓанската иницијатива за собирање на потписи против изградба на бегалски кампови.

По целосно документирање на настанот, против лицето ќе биде поднесен соодветен поднесок до надлежното Основно јавно обвинителство Скопје, а во врска со основано сомнение за сторено кривично дело - “насилство“.