Лажна вест е дека државата ќе гради станови за бегалците и дека тие ќе останувале во Македонија, реагираат од Министерството за труд и социјална политика. 

Во Република Македонија нема да се градат кампови за бегалци, нема да се даваат државјанства за бегалци, ниту пак ќе се активираат некои други мерки во таа насока. 

„Република Македонија е држава која е транзитна станица на бегалците, и во минатото, и во бегалската криза од 2015/16 година. Kако земја членка на Обединетите Нации, нашата земја ќе им помогне на бегалците на нивниот пат кон крајните дестинации, согласно меѓународните стандарди и ратификуваната Конвенција за правата на бегалците од 1994 година. 'Предлог Стратегијата за интеграција на бегалци и странци 2017-2027' е продолжение на иста таква стратегија за периодот 2009-2015 година, донесена од претходната влада на ВМРО-ДПМНЕ. Документот нема никакво обврзувачко дејство и тие кои во минатото ја потпишале оваа стратегија го знаат овој факт. И во оваа прилика ги осудуваме дезинформациите и наменското ширење страв и ксенофобија кај граѓаните“- се наведува во реакцијата на МТСП.

Секоја информација во поинаква насока е лага, неточна и невистинита, одговара МТСП откако ВМРО-ДПМНЕ обвини дека ќе се градат такви кампови за бегалци.