Како притисок врз работењето го доживува Првиот програмски сервис на Mакедонската радиотелевизија, соопштението од СДСМ со кое партијата го осуди пренесот на телевизијата од одбележувањето на Илинден. Од јавниот сервис тврдат дека ставовите на гостите во студиото се лични ставови, а тие биле единствени кои ја прифатиле поканата да учествуваат во емисијата.

СДСМ тврдеше дека со вчерашната програма се згазени националните и стратешките интереси

„Јавниот сервис и годинава, како со години наназад, организира отворена програма во која вршеше директни преноси од говорите на претставниците на државниот врв и во која, како и досега, учествуваа историчари и се емитуваа прилози поврзани со Илинден.

Изнесените ставови на присутните гости во студиото, кои беа единствените кои ја прифатија поканата за учество во емисијата, се нивни лични ставови.

Јавниот сервис ги отфрла наводите дека со денешната програма, се оспорени и се доведени во прашање стратешките интереси на Република Македонија, и дека членството во ЕУ и НАТО е сведено на полемика, како определба на една политичка структура.

Ваквата реакција на СДСМ, првиот програмски сервис на МТВ ја оценува како директен притисок врз нејзиното работење. И во иднина ќе реагираме на неоснованите обвинувања, без разлика од која страна доаѓаат, дали од власта или од опозицијата“, соопштија од МРТ.