Од понеделник стартува имунизацијата на штитениците во сите домови за стари лица на териотиријата на град Скопје. Директорот на Здравствен дом-Скопје, д-р. Виктор Исјановски за Фактор посочува дека мобилните тимови се целосно подготвени да ја направат вакцинацијата против сезонскиот грип на повозрасните лица кои живеат во приватните домови за стари лица.

-Тие се ранлива категорија граѓани. Мора да се заштитат од сезонскит грип. Мобилните екипи се целосно подготвени и според сите стандарди и протоколи ќе ја завршат имунизацијата која за нив секако е бесплатна. Инаку, генерално вакцинацијата во сите пунктови на Здравствен дом Скопје се одвива непречено. Сега има и поголем број на термини, вакцинираме и во сабота. Интересот кај граѓаните е навистина голем за разлика од изминатите години, појаснува д-р. Исјановски.

Со новите термини вакцинацијата во Здравствен дом Скопје, се одвива во 6 поликлиники: Ѓорче Петров, Букурешт, Чаир, Бит Пазар, Ченто и Јане Сандански. Имунизацијата е со упатување од матичен лекар преку МојТермин во период од 14 до 19 часот.

Со ситемот МојТермин од завчера се отворија 1800 термини за Скопје за период од една недела, како и дополнителни 1080 термини за деновите - сабота, четврток и петок. Во работните денови пунктовите за вакцинација работат до 19 часот, а во саботите од 8 до 14 часот.

Вакцинација е бесплатна за следните дефинирани ризични групи: Стари лица (над 65 години), лица со хронични заболувања, здравствени работници, Бремени жени и децата на возраст од 6 месеци до 5 години.