Парламентарното мнозинство уште во првата предвидена пленарна седница успеа без никакви пречки да го изгласа конечниот предлог Буџет за 2018 година. На расправата и гласањето не присуствуваше опозицијата, па така нема да има ни потреба од вкупно 5 дена дебата како што е предвидено со законот.

„Вкупните потреби за финансирање во 2018 година изнесуваат 40,9 милијарди денари. Овие потреби за финансирање ќе се обезбедат преку комбинација на задолжување во странство и на домашниот пазар на државни хартии од вредност. Задолжувањето во странство може да се реализира преку издавање на еврообврзница  или повлекување средства од поволни странски кредити“, вели Драган Тевдовски - министер за финансии

Пратениците жалеа, што во собраниската сала недостига дебата, ниту придонес од опозицијата со свои критики и забелешки.

„Ова е трет пат буџетот како најважен финансиски документ на една држава, односно најважен инструмент на јавното финансирање да се носи без опозиција“, вели Томислав Тунтев - пратеник СДСМ

Со буџетот за 2018 година се обезбедува зголемување на платите за вработените во Армијата, образованието и здравството, а се зголемуваат и капиталните инвестиции. Еден од главните проекти за идната година ќе биде гасификацијата на Македонија.