Владата на Македонија денеска за прв пат ќе одржи седница во Битола, а истата треба да биде прва од низата кои во наредниот период ќе се одржуваат во различни региони во државата.

Редовна 159-та седница ќе се оддржи во зградата на општината од 18 часот, со истата ќе претседава премиерот Зоран Заев, а ќе присуствуваат сите министри, додека како гости поканети се градоначалниците од Пелагонискиот регион, од општините Битола, Прилеп, Крушево, Кривогаштани, Долнени, Новаци, Могила и Демир Хисар.

Приоритет како точки на дневен ред ќе добијат информациите и одлуките за проекти од непосреден интерес на граѓаните на овие општини. Пред одржувањето на седницата , повеќе министри ќе се запознаат со спроведувањето на повеќе владини проекти во општина Битола.

Заедно со градоначалничката Наташа Петровска, Министерот за транспорт и врски Горан Сугарески и директорот на ЈП за државни патишта Зоран Китанов ќе извршат увид во работите на рехабилитацијата на регионален пат Прилеп-Тополчани-Битола. Увид со Петровска во напредокот на изградба на пречистителна станица за отпадни води во подпелистерските села Трново и Магарево ќе изврши заменик министерот за животна средина Јани Макрадули. Министерот за здравство Венко Филипче ќе го посети Здравствениот дом во Битола, кадешто пред 1 месец се пушти во употреба реновираната Служба за итна медицинска помош. Бо посета на РЕК Битола, ќе биде вицепремиерот за економски прашања Кочо Анѓушев кој заедно со Макрадули и Петровска ќе ја промовираат мерката за инвертер клими. Министерката за труд и социјална политика Мила Царовска ќе посети неколку мали групни домови во општината.