Министерството за животна средина соопшти дека загадувањето со SO₂, NO₂, CO и O₃ не надминува гранични вредности, но концентрациите на РМ₁₀ во Лисиче и Центар понекогаш се зголемуваат.

Според податоците од Државниот автоматски мониторинг систем за квалитет на амбиентен воздух – ДАМСКАВ, во периодот од 10 до 12 септември 2025 година, не се регистрирани надминувања на граничните вредности за SO₂, NO₂, CO и O₃, соопшти Министерството за животна средина и просторно планирање.

Сепак, надминување на среднодневната гранична вредност за честичките РМ₁₀ (50 μg/m³) е забележано на два мерни места. На Лисиче, на 10 септември, измерената концентрација достигна 55,93 μg/m³, особено во вечерните и ноќните часови од 19:00 до 02:00. На мерното место Центар, на 11 септември, концентрацијата на РМ₁₀ изнесуваше 50,41 μg/m³.

„Воопшто, часовните концентрации на РМ₁₀ се релативно ниски на повеќето мерни места во Скопје, со исклучок на Лисиче, каде што се забележани повисоки вредности во ноќните и утринските часови, додека попладне концентрациите се пониски“, се наведува во соопштението на Министерството.

Министерството потенцира дека систематското следење на квалитетот на воздухот е клучно за превенција и навремено информирање на граѓаните за можните ризици, со цел заштита на јавното здравје.

Фото: ЦУК/Вибер група