Министерството за здравство по објавувањето на националниот план за имунизација дообјаснува дека во првата фаза, покрај здравствените работници кои се во директен контакт со ковид-пациенти, ќе се вакцинираат и матичните стоматолози и матичните гинеколози.

На вчерашната прес-конференција единствено беше кажано дека во првата фаза ќе бидат вакцинирани здравствените работници кои работат со ковид пациенти и лица над 70 години.

„На вчерашната прес-конференција, министерот за здравство Венко Филипче изјави дека први се вакцинираат сите лица од група 1а. Во истата се вклучени и матичните лекари и друг здравствен персонал вработен во матичните ординации, овде спаѓаат матични стоматолози, гинеколози и лекари“, дообјаснуваат од министерството.

Стоматолозите и гинеколозите по објавувањето на Планот реагираа дека се ставени во втората фаза за вакцинирање.