Македонскиот премиер Зоран Заев денеска ќе се сретне со претседателот на бугарската влада Бојко Борисов во Софија. Главна тема на состанокот најверојатно ќе бидат преговорите за заедничко одбележување на празниците и историските личности, со оглед на тоа што во делегацијата на Заев од македонската Влада е најавен само уште министерот за култура Асаф Адеми.

Според официјалната агенда што ја објави прес-службата на бугарската Влада, Борисов и Заев ќе разговараат за соработката во различни сектори, проекти во сферата на инфраструктурата и транспортот, како и досегашните исполнувања од Договорот за добрососедство од 2017-та.

Инаку Адеми заедно со бугарскиот колега Боил Банов ќе положат венец пред споменикот на Гоце Делчев во Борисовата градина по повод 147-годишнината од раѓањето на деецот. Потоа двајцата ќе ја потпишат програмата за соработка во културата.