Поранешниот министер за транспорт и врски, миле Јанакиески, ќе излезе порано од затвор. Наместо во 2025, условниот отпуст ќе му започне во јуни годинава. Вака одлучи Апелациониот суд, кој со одлука ја уважи жалбата на одбраната на Јанакиески.

„Апелациониот суд - Скопје ја информира јавноста дека Кривичен совет на Судот донесе решение со кое жалбата на Основното јавно обвинителство за гонење организиран криминал и корупција се одбива како неоснована, додека жалбата на осудениот М.Ј, од С., изјавена преку неговиот бранител, со која се бара условен отпуст, се уважува.

Согласно донесеното решение на Апелациониот суд - Скопје, одлуката за условен отпуст е преиначена и условниот отпуст за осудениот М.Ј. наместо, како што гласеше првичната одлука, да започне на 16.01.2025 година, ќе започне на 17.06.2024 година, но под услов до истекот на условниот отпуст обвинетиот да не стори ново кривично дело“, соопшти Апелација.