Амбасадорот Микалис Рокас, новоименуваниот шеф на Делегацијата на ЕУ во  Македонија, ја повтори цврстата поддршка на Европската унија за патот на земјата кон европската интеграција. На свечена церемонија, Рокас и ги предаде акредитивните писма на претседателката Гордана Силјановска-Давкова и ја истакна подготвеноста на ЕУ да им помогне на владата, институциите и граѓанското општество.

Тој го посочи претпристапниот инструмент (ИПА) како клучна алатка за зајакнување на институциите во земјата. Рокас изрази оптимизам дека и преговорите и реформите наскоро ќе станат заемно корисни и за Македонија и за ЕУ.

„И двата процеса се предизвик за вашата влада и јавната администрација. Подготвени сме да ја обезбедиме сета потребна помош преку ИПА. Посветени сме на отворен дијалог, слушање, советување и наоѓање решенија заедно“, рече Рокас.

Тој, исто така, ја истакна посветеноста на ЕУ за промовирање на човековите права, владеењето на правото и меѓународниот мир.