Владата ќе ги надомести штетите по силното невреме кое вчера ја зафати Македонија. 

Како што вети премиерот, Христијан Мицкоски, Владата има механизми за помош и никогаш нема да ги остави граѓаните сами да се снаоѓаат во вакви елементарни непогоди. 

„Им благодарам на институциите и на градоначалниците што во текот на ноќта, веднаш по невремето што го зафати Скопје, беа на терен и заедно со надлежните институции ги санираа штетите. И денес ќе продолжат со активности, бидејќи станува збор за епско невреме. Подготвеноста и мотивацијата од нивна страна беа на високо ниво. Штетите ќе бидат констатирани и рефундирани“, изјави Мицкоски.

Невремето предизвикало најголеми штети токму на подрачјето на СВР Скопје. Во главниот град, според податоците евидентирани до 22:00 часот синоќа, регистрирани се: 117 оштетени патнички моторни возила (најчесто од паднати дрвја и предмети);
35 оштетени покриви на станбени и деловни објекти; 189 паднати дрвја низ скопските улици и паркови; 10 повредени лица кои веќе се медицински згрижени; 7 дефекти на семафори и 5 пријавени пожари предизвикани од невремето.

Во рок од два дена невреме имаше во Скопје, Куманово, Дојран, Струмица, Делчево и на други места. 

Вчерашното силно невреме што ја зафати Македонија било проследено со ветер со јачина на ураган, соопшти Управата за хидрометеоролошки работи (УХМР), додавајќи дека се регистрирани удари и до 134 километри на час.

фото Фејсбук/Христијан Мицкоски