Премиерот Христијан Мицкоски за барањето на в.д. градоначалникот на Гостивар, Валбон Лимани да остане на должноста до изборот на нов градоначалник, во согласност со Законот за локалната самоуправа, а да не се именува владин повереник, Мицкоски рече дека Лимани требал со медиумите да сподели и други работи.

„Не знам дали сподели со вас дека тој усвоил на Совет два детални урбанистички плана без да добие мислење на институциите, а тоа е кривично дело. Претпоставувам дека не споделил. Треба и тоа да го сподели до медиумите кога дава какви било сугестии“, рече Мицкоски.

Тој додаде и дека со коалициските партнери во Владата ја отвориле темата за именување владини повереници во четирите општини каде не беа избрани градоначалници и ќе разговараат.

Владата ќе именува повереници во Гостивар, Врапчиште, Центар Жупа и во Маврово Ростуше каде не беше постигнат потребниот цензус за излезност на локалните избори.

фото Фејсбук/Валбон Лимани