Мицкоски од Вашингтон порача дека ќе ги смени судиите и обвинителите
Премиерот Христијан Мицкоски во Вашингтон во своето излагање за трансатлантските односи на Западен Балкан во Европскиот центар при Атлантскиот совет порача и дека ќе ги смени судиите и обвинителите, затоа што „биле поставени од претходната власт“.
„Кога луѓето ме прашуваат: Што правите? Што можете да кажете за ова? Што точно правите во моментов? – мојот одговор е секогаш ист: Ние се бориме против нив, и тоа одлучно.
Имаме одлични закони напишани на хартија, но проблемот е во нивната примена. А кој е одговорен за спроведувањето? Обвинителите и судиите. Како тие стануваат обвинители и судии? За жал, тие се назначени од оние кои самите станале политички криминалци.
Нашиот прв приоритет е да го смениме начинот на размислување на обвинителите и судиите, за да носат одлуки врз основа на законите и Уставот – а не според барањата на политичарите што ги избрале“,порача Мицкоски во Вашингтон.
Мицкоски изрази очекување за унапредување на односите меѓу САД и Македонија со новата администрација во Вашингтон.
„Мислам дека во наредниот период ќе го зголемиме стратешкото партнерство. Можеби сме мали, но со големо геополитичко значење. Ние сме земја без излез на море, но сме во срцето на Балканот, природна раскрсница што поврзува или вкрстува два многу важни паневропски коридори, коридорот 10 и коридорот 8. Коридорот 8 е вториот најважен коридор за НАТО, кој го поврзува Црното море со Јадранското Море, практично пристаништето Варна во Бугарија и пристаништето Драч во Албанија“, изјави македонскиот премиер.
Слично
Поврзани вести
