МВР интензивно започна со одземање на возилата на сите оние кои биле фатени како управуваат без возачка дозвола, по што синоќа во неколку градови граѓани од ромска националност одржаа протести, а премиерот Христијан Мицкоски денес најави жесток одговор по вчерашото палење оган поради „Безбеден град“

- Ќе биде одговорено жестоко, за да не се повтори вчерашното дивеење што се случи, кажа премиерот за протестите на дел од граѓаните од ромска националност

За протестите и блокадите на неколку патишта во земјава од страна на граѓани од ромската заедница и критиките кон проектот „Безбеден град“, премиерот Христијан Мицкоски вели дека утрово разговарал со министерот за внатрешни работи, Панче Тошковски и побарал од него да биде санкциониран секој оној кој јавно упатил закани и го загрозил мирот и безбедноста.

- Она кое што го побарав од него е кон секој оној кој што го прекршил законот, се заканувал и го загрозил мирот на граѓаните, жестоко да се одговори. И ќе биде одговорено жестоко, за да не се повтори вчерашното дивеење што се случи, кажа премиерот по одбележувањето на 4 февруари – Денот на раѓањето на македонскиот револуционер Гоце Делчев.