Нови тврдења произлегуваат од партијата на долгогодишниот коалиционен партнер на владеачката гарнитура во однос на платформата која стана сопка за состав на новата влада.

Овој пат градоначалникот на Чаир и потпретседател на ДУИ, Изет Меџити тврди дека партијата на Никола Груевски прифатила двојазичност и многу повеќе отколку СДСМ и дека само СЈО било пречка за коалиција меѓу ДУИ И ВМРО ДПМНЕ.

Меџити ова тврдење во јавноста го пласираше преку емисијата „Патот кон“ на телевизија Алсат М . Тој тврди дека ВМРО–ДПМНЕ прифатиле и повеќе од тоа што првично се барало од страна на албанските партии, освен СЈО.

„ВМРО-ДПМНЕ прифати и двојазичност и казни за директорите на институции каде нема да се зборува албански. Се прифатија, само за СЈО не сакаа да слушнат! Затоа не ни успеа коалицијата со нив! И за ова имаме писмени докази“, рече Изет Меџити.