Потпретседателот на СДСМ, Дамјан Манчевски, по исказот во Обвинителството за „крвавиот четврток“, денеска изјави дека секој момент е можно да ги дадат гаранциите на претседателот, Ѓорѓе Иванов за добивање на мандат за составување Влада. 

Тој вели дека се подготвуваат гаранциите, но не даде прецизен одговор дали писмото коешто треба да се достави до претседателот е веќе напишано и дали нивните ставови се конечно усогласени.

„Секој ден очекуваме дека ќе бидат доставени овие гаранции или допис или што и да треба за господинот Иванов ја сфати вистината дека не е загрозен ниту унитарниот карактер на државата, ниту Уставот. И сами знаеме дека тоа беше негова политичка игра за да успее да му удоволи на Никола Груевски. Во ред, кажавме, спремни сме и секој ден кога и тој ќе биде подготвен тоа ќе може да го направиме“ - рече пратеникот. 

Манчевски за насилството во Собранието на 27 април  се надева дека ќе има одговорност. Сите детали за тоа што се случуваше во Собранието ги кажал во обвинителството. 

„Апсолутно сметам дека стануваше збор и за обид за убиство и за класично насилство. Сега прашање на Обвинителството е како понатаму ќе ги процесуира овие случаи. Ги даваме многу конкретни нашите изјави, со сите детални информации и се надевам дека во најскоро време и во Обвинителството ќе се покренат нови обвиненија коишто ќе значат потежок вид на кривични дела“ - вели Манчевски.