Кумановскиот градоначалник, кој најавува дека има амбиции да трча за нов мандат за градски татко на Куманово, вели дека во неговиот град се зголемува бројот на заразени од коронавирусот, а како причини ги наведува спората имунизација, но и опуштеноста на граѓаните, што, како што вели, е појава кај поединци.

„Ние како Општински штаб за заштита и спасување, информациите ги споделуваме на дневна и на неделна основна. За разлика од петата недела во оваа година кога бројката беше 74 позитивни, но последната недела бројките отидоа на 195. Алармот никогаш не бил исклучен, но за жал и постапката за имунизација која е спора, но и опуштањето на граѓаните си ги покажува своите ефекти. Мерките и правилата мора да се почитуваат“, изјави во Утрински брифинг градоначалникот Димитриевски.

Говорејќи за состојбата со ковидот во Куманово, градоначалникот Димитриевски вели дека луѓето се дисциплинирани и носат маски, но за жал постојат и такви кои не ги почитуваат целосно правилата и препораките.

„Гледам дека полицијата постапува со прекршочни казни, но сето тоа се однесува до колективната свест за колективното здравје и апелирам граѓаните да се придржуваат до препораките. Преголемото ширење на лажните вести и на некој начин воведувањето на скептицизам кај грѓаните доведе до ваква состојба. Се покажа дека воопшто човештвото не е подготвено за вакви крупни предизвици“, вели Димитриевски.

„Имам амбиции да трчам за нов мандат, но граѓаните се тие кои го даваат мандатот, а партиите се тие кои што даваат поддршка. Јас верувам дека мојата партија ќе ми даде целосна поддршка, бидејќи истата ја чувстувам од граѓаните“, вели Димитриевски.