Јани Макрадули од СДСМ, преку објава на социјалните мрежи се осврна на политичките случувања во Унгарија, порачувајќи дека вниманието мора да се насочи кон домашните проблеми и потребата од промени во Македонија.

Тој нагласува дека не треба да се прават паралели со странски процеси, туку фокусот да биде на домашната политичка реалност.

– Да се секиравме вака за Македонија како за Унгарија, гарант подобро ќе ни беше. Историјата нѐ учи дека револуцијата во една земја е уникатна, не се увезува и не се копира – пишува Макрадули.

Според него, промената на власта не доаѓа преку реакции на настани во други држави, туку преку кредибилна понуда пред граѓаните.

– До промена на власта не се доаѓа со постови за Унгарија, туку со гласање на кредибилна понуда, претставена со луѓе од доверба – наведува тој.

Макрадули смета дека на Македонија ѝ е потребна нова влада, и тоа во најкраток можен рок.

– А дека ни треба нова влада, немам дилема. И тоа час поскоро. Затоа што оваа ниту знае, ниту вреди – додава Макрадули.

Во објавата, тој посочува дека вистинските проблеми на граѓаните се занемарени, наведувајќи примери од образованието, економијата и социјалната сфера.

– Џабе победи Маѓар кога кај нас изгуби Универзитетот. Џабе Унгарија слави, кога во Македонија професорите молчат – пишува тој, додавајќи дека студентите и работниците се соочуваат со реални притисоци.

Макрадули апелира за создавање широк прогресивен фронт, кој, како што вели, треба да биде инициран од СДСМ.

– Иницијативата за прогресивниот фронт мора да дојде од СДСМ. Спремна за партнерства и за ветинг во сопствените редови, како прв чекор – нагласува тој.

Воедно, повикува и на институционални механизми за одговорност, споменувајќи ја можноста за надзорна расправа во Собранието.

– За милијардата, неколку пати сум предлагал надзорна расправа во Собрание. Надзорна веднаш – посочува Макрадули.

Тој заклучува дека промените во Македонија зависат од домашната политичка мобилизација и од способноста да се понудат конкретни решенија за граѓаните.