Македонскиот рубин и официјално е заштитен како наш македонски полускапоцени камен, објави министерката за енергетика Сања Божиновска која на пресконференција со новинарите сподели дека пристигнало решението со кое и официјално се заштитува македонскиот рубин.

- Го заштитивме македонскиот рубин. Му благодарам на Геолошкиот завод за соработката. Веќе имаме нешто македонско заштитено. Продолжуваме понатаму со заштита и на одредени видови мермер - рече министерката на брифинг со новинарите.

Рубинот што се вади во Македонија е геолошки и естетски уникат: познат е како корунд со карактеристична малиново-розева боја, што се јавува поради присуството на хром во неговата кристална структура. Се наоѓа исклучиво во околината на Прилеп и во планините на Мариово, што го прави единствен природен рубин во копнената Европа што се обработува локално. 

Покрај својата естетска и колекционерска вредност, тој претставува дел од културното и историското наследство на земјата - симбол на природната убавина и националната гордост.

Активностите за заштита на македонскиот рубин почнаа во септември 2025 година.

Божиновска на брифингот информира за сработеното во втората година од постоењето на Министерството за енергетика.