Маглата од утрово пак го отежнува авионскиот сообраќај на аеродромот „Александар Велики“ во Скопје. Утрово, според информациите од аеродромските служби, со задоцнување полетале авионите за Дортмунд и Загреб, а летовите за Истанбул се целосно откажани. За слетување, доцнат авионите од Дортмунд и Виена. Скопскиот аеродром имаше проблеми со маглата и на почетокот на месецов, кога неколку дена сите летови беа откажани. Маглата на крајот од минатата година, пак, предизвика пад на бројот на патници од аеродромот во декември. Магла има и по патиштата низ Македонија. На патните правци Тетово - Скопје - Велес - Штип, Неготино - Градско, Кула - Катланово и Катланово - Велес намалена е видливоста до 50 метри. Железничкиот сообраќај се одвива без проблеми.