Пазарот на луксузни недвижности во Европа бележи силен раст, при што цените на најпрестижните вили и апартмани продолжуваат да се зголемуваат. Според извештајот за богатство на компанијата Knight Frank, повеќе од половина од околу 50 европски градови ќе имаат годишен раст на цените поголем од 3 проценти во 2025 година.

Најголем пораст во Европа забележа Прага, со раст од 14,6 проценти, со што стана водечки град на континентот. Значителен раст има и во францускиот Мерибел (9%), португалскиот Порто (8,5%) и шпанската Марбеља (8,1%). Меѓу другите дестинации со силен раст се Куршевел, Фиренца, езерото Комо, Гштад, Рим и Кинта до Лаго.

Заедничко за најуспешните пазари се атрактивните туристички и „lifestyle“ дестинации – алпски ски-центри, медитерански одморалишта и културни градови, кои се особено привлечни за богатите купувачи.

Од друга страна, Лондон бележи најголем пад во Европа, со намалување на цените на луксузните недвижности за 4,7 проценти. Според анализата, причината се даночните промени за богатите жители, кои ги намалуваат буџетите и ги насочуваат кон изнајмување наместо купување. Пад е забележан и во Ибица, Џерси и Лозана.

Меѓу европските метрополи, умерен раст има во Мадрид (5%), Осло (4,2%) и Берлин (3,4%), додека во Лисабон, Даблин, Виена и Париз растот е послаб. Стокхолм бележи мал пад, а цените во Единбург остануваат стабилни.

На глобално ниво, Токио е апсолутен лидер со раст на цените од дури 58,5 проценти, поттикнат од силна побарувачка, ниски каматни стапки и недостиг на новоградба. Следи Дубаи со раст од 25,1 процент, додека Манила и Сеул исто така се меѓу најбрзо растечките пазари.

Најголеми падови глобално се забележани во кинеските градови како Гуангжу, Шенжен, Шангај и Пекинг, како и во канадските Торонто и Ванкувер, што укажува на забавување на тие пазари.

Извештајот покажува јасен тренд: луксузните недвижности во туристички и престижни дестинации продолжуваат да ја зголемуваат својата вредност, додека дел од големите финансиски центри заостануваат зад овој раст.