Локалните избори ќе бидат распишани на 6 август, а ќе се одржат на 15 октомври, изјави спикерот Талат Џафери, во интервју за државната новинска агенција МИА. 

По распишувањето, ќе почнат да течат роковите за нивна организација, а Собранието би работело до почетокот на предизборната кампања, на 25 септември. 

Државната изборна комисија почна со подготовките за локалните избори. Донесени се упатства за родова еднаквост на листите на кандидати и за лична идентификација при гласањето. За да го превенираат големиот број на неважечки ливчиња, го олеснија критериумот за важечко ливче, во случаи кога од него јасно и недвосмислено се гледа желбата на гласачот. Ливчињата ќе бидат важечки само доколку се пополнети со заокружување. 

Александар Чичаковски, претседател на ДИК  информираше дека, и покрај големиот број на неважечки ливчиња, кои на последните избори беа 37 870, а на последните локални избори дури 50.000, сепак сме во европскиот просек, кој во Централна и Источна Европа е 7 проценти за парламентарни избори, а 9 за локални. 

Членот на ДИК, Субхи Јакупи кажа дека разликата на бројот на неважечки ливчиња на последните два циклуса избори била мала.

Од ВМРО-ДПМНЕ најавија дека, секој ден ќе бараат и вонредни парламентарни избори заедно со локалните.