Љупчо Палевски-Палчо, во видео кое го објави на својот фејсбук профил, практично признава дека тој е лицето кое е обвинето од Основното јавно обвинителство Скопје, за продолжено кривично дело - Оддавање службена тајна, согласно член 360 став 1 во врска со член 45 од Кривичниот законик.

Тој во видеото од Обвинителството ги нарекува воајери кои цело време ги следеле активистите на Бојкотирам, и искажува еден куп погрдни зборови и за обвинителите, и за премиерот. Тврди дека нема да го замолчат, како и дека денеска Обвинителството си го признало своето дело, а тоа, како што рече, е прислушувањето.

„Денеска конечно обвинителствбото си го призна сопственото дело, а тоа е да прислушуваат, и 2017 и 2018 година, и дека традицијата да се прислушуваат секакви активисти и борци за човекови права, продолжува. УБК, денешна АНБ се занимаваат само со воајерство и прислушување на граѓани, овластено, неовластено, небитно. Не е битно ни кој прави проценка. Но, денеска сум радосен за прв пат во мојот живот што поднесовте кривична пријава.

Е па вака, да ве поздравам многу, дека Љупчо Палевски објавил службена тајна која некој друг му ја доставил, и не е битно кој му ја доставил. Љупчо Палевски во тие писанија, е организатор и идеолошки инспиратор на атентат на премиер. На премиерот не му фали влакно. Вие бидејќи сте во паника и се решивте после 10 месеци да поднесете кривична пријава за оддавање службена тајна. Е овој пат ја признавате содржината на службената тајна, а тоа е прислушување на сите активисти на ‚Бојкотирам'. Но нема да ме исплашите“, вели Палевски. 

Најавува дека ќе достави многу повеќе материјал од претходно и најавува дека ќе игра до крај. 

„Јас на пресот прашав зошто ако сум обвинет за такво кривично дело, три години не сум повикан во Обвинителство“, вели Палевски во видеото. 

Фактор објави за обвинението од Обвинителството, за оддавање на државна тајна, во кое нема иницијали на обвинетото лице.