Обвинителката Ленче Ристоска тврди дека е под притисок и заплашување. Бара извинување од ВМРО-ДПМНЕ, во спротивно најавува тужба за партијата, чиј имот е замрзнат поради тековна постапка.

Ристоска вели дека е мета на притисок и заплашување поради двете  постапките коишто ги води, а со кои е засегната ВМРО-ДПМНЕ. По одлуката „Белата палата“ и останатите 68 недвижности во сопственост на владејачката партија да останат замрзнати, ВМРО-ДПМНЕ на веб- страницата објавија соопштение со наслов: „Ристоска – тажен симбол за неправда со државни бонуси и службена картица во служба на Заев и Груби“. 

„Ова соопштение го доживувам како притисок и заплашување од лице за кои се води кривична постапка врз јавен обвинител“, вели Ристоска во објава на социјалните мрежи. 

„Ако некој знае што значи „повисока плата“, тоа се токму тие што си делеа бонуси, награди и привилегии додека обвинителството им се распаѓаше под тежината на сопствените злоупотреби“, се вели во соопштението.

Ристоска бара извинување од ВМРО-ДПМНЕ во рок од седум дена од соопштението или да ги докаже своите тврдења дека нејзиното професионално делување било „инструирано од политички чинители и криминални структури, дека самата си исплатувала бонуси и награди и користела службени картички“.  Ако нема извинување, таа ќе тужи.