Италијанската влада воведе еднократен данок од 40 отсто на добивката на банките, а собраните пари планира да ги искористи за да им помогне на луѓето кои земаат хипотекарни заеми да го купат својот прв имот.

Наглиот раст на каматните стапки на централната банка им донесе рекорден профит на банките, бидејќи тие можеа овој раст да го пренесат на корисниците на кредитите, а во исто време не ги зголемија значително каматните стапки на депозитите. Земјите како Шпанија и Унгарија веќе воведоа данок на прекумерната добивка на банкарскиот сектор.

Италијанската влада годинава ќе ја оданочува со еднократен данок од 40 отсто нето каматната маржа на банките, што ја претставува разликата меѓу каматите на заемите и депозитите и е извор на заработката на банките. Тој проценува дека со овој данок ќе инкасира нешто помалку од три милијарди евра, дознава Ројтерс од добро упатени извори.

Десничарската влада на Италија постојано ги критикуваше банките дека не ги пренесуваат повисоките трошоци за пари на штедачите, но се помести само по најновиот сет на рекордни приходи пријавени од банките кон крајот на јули и почетокот на август.

Сите италијански банки работеа многу подобро од очекуваното и ги зголемија проценките за профитот благодарение на зголемените каматни стапки. Водечката италијанска банка Intesa Sanpaolo на крајот на минатиот месец објави дека очекува приход од над 13,5 милијарди евра од нето каматната маржа оваа година.

Уникредит, исто така, ги подобри финансиските насоки за оваа година и сега очекува да постигне нето приход од над 21,5 милијарди евра и нето добивка од над 7,25 милијарди евра оваа година.

„Треба само да ги погледнете профитите на банките во првата половина од годината за да разберете дека не зборуваме за неколку милиони, туку за милијарди“, рече вицепремиерот Матео Салвини на прес-конференција во Рим доцна во понеделникот. „Ако (точно е дека) товарот на повисоките каматни стапки е двојно зголемен за домаќинствата и бизнисите, она што го добиваат имателите на тековните сметки сигурно не е двојно зголемено“, рече Салвини, додавајќи дека постои голем јаз меѓу применетите стапки на заемите и депозитите. 

Пословни.хр