Процесот „прв дојден, прв услужен“ беше хаотичен, особено кога имате 2,1 милиони лични документи кои што треба да се издадат. Она што сега се обидуваме да го направиме како решение е на еден достоинствен начин, во рамки на систем, да го регулираме процесот и да сториме се што е можно за обезбедување на документите. Ова го кажа техничкиот министер за внатрешни работи, Панче Тошковски при посета на службите за управни работи во Куманово, каде во функција е ставен нов систем. 

Тој, на прашање на новинарите се осврна на ситуацијата со фотографирањето и подигањето на личните документи на граѓаните, особено за состојбата во ПС „Пролет“ во Скопје, за каде Тошковски потенцираше дека има многу поголеми гужви, отколку во Куманово, и токму затоа појасни дека Куманово е одбран за имплементација на системот кој го обезбедило Министерството за администрација. :

- Се сеќавате 5000 луѓе пред врата, а внатре фотографираат на дневна основа по 300 лица. Овде во Куманово го нема тоа, но сепак има наплив од граѓани кои имаат потреба да ги променат документите - посочи Тошковски.

Тој информира дека МВР размислува да воведува систем за проверка на готовите лични карти во Скопје, како и испраќање на СМС пораки, како што е случајот со патните исправи. За времето потребно за имплементација, министерот истакна дека се уште не може да каже точно кога ќе профункционира и најави дека ќе се произнесе дополнително.

Во Куманово беше и дополнителниот заменик министер на Министерството за информатичко општество и администрација, Стефан Андоновски.

- Од денес, на брз, достоинствен и лесен начин граѓаните ќе можат да се фотографираат за лични документи, како и да ги подигнат истите без да чекаат во ред - изјави Андоновски.

МИОА обезбеди систем за управување со клиенти, кој го минимизира метежот.

- Дигитализацијата на процесите го олеснува животот на граѓаните. Затоа е многу важно истата да се случува во сите институции и сите услуги. Дигиталната трансформација ќе значи брзи, точни, навремени и евтини услуги, намалено време на чекање и задоволни граѓани - посочи Андоновски.

И во понатамошниот период продолжуваме со институционалната соработка во служба на граѓаните.

Фото: Принтскрин/Фејсбук