Продолжува кризната состојба во земјава. Сега таа се продолжува за наредните шест месеци, почнувајќи од 1 јули 2021 до 31 декември 2021 година. 

Собраниската Комисија за одбрана и безбедност денеска ја одржа 17-та седница на која е донесена одлука за продолжување на кризната состојба. Комисијата ја проследи одлуката до Собранието, кое, како што е најавено, утре ќе одржи пленарна седница. Кризната состојба, со претходна одлука на Собранието, е до 30 јуни 2021 година. 

Претседателот на Комисијата, Миле Талевски за МИА изјави дека на седницата присуствувале министерот за внатрешни работи Оливер Спасовски и директорот на Центарот за управување со кризи Стојанче Ангелов.

„Комисијата отвори дебата. Се разгледаа можности и предлози и се донесе одлука да се проследи до Собранието, на пленарна седница што ќе се одржи утре“, изјави Талевски.

Тој појасни дека собраниската Комисија за одбрана и безбедност има само обврска да ја проследи и да отвори дебата по нејзината работа.

Во земјава нагло се намали бројот на заразени со коронавирусот. За 24 часа има само 1 нов случај.