Секторот за внатрешни работи Струмица до Основното јавно обвинителство поднел кривична пријава против поранешниот градоначалник на општина Ново Село, Блажо Велков, затоа што тој го користел службениот автомобил и по истекувањето на мандатот.

Велков се товари за две кривични дела „послужување во службата“ и „посебни случаи на фалсификување исправа“.

Според полицијата, екс градоначалникот на 18 октомври, истиот ден кога му било врачено уверението на новиот градоначалник на општината, Боро Стојчев, одбил да изврши примопредавање на службеното возило и изготвил налог за патување во Скопје, заедно со неговата сопруга, кое според полицијата, било за приватни потреби.

Екипа на струмичката полиција го запрела возилото кај бензинската пумпа на „Лукоил“, пред влезот на Струмица, во кое совозач била сопругата на Велков, која, како што стои во соопштението на МВР, неовластено снимала со мобилниот телефон.

Полицајците, по наредба на ОЈО Струмица, го одзеле службеното возило, како и телефонот на сопругата на Велков.

Ова е втора кривична пријава против екс градоначалникот на општина Ново Село. Кон крајот на септември за време на кампањата за локалните избори, против него беше поднесена кривична пријава за злоупотреба на службената положба бидејќи на вработени од општината им одобрил да ги користат службените возила за разнесување на пропагадни материјали.