МВР поднесе кривична пријава за поранешната организациска директорка на Универзитетска клиника за токсикологија, Бесија Иљази, за неовластенa поделба на околу 11.000 евра за исплата на 17 хонорари за спорните вработувања. Хонорарците, за кои и самиот Државен здрavствен инспекторат сметаше дека се непрописно ангажирани, повеќе не работат на оваа Клиника.

„На 12.07.2024г. Одделот за сузбивање на организиран и сериозен криминал, Единица за корупција во соработка со Одделот за криминалистичка полиција, поднесе кривична пријава против Б.И. (29) од Тетово, заради постоење на основано сомнение дека сторила кривично дело „злоупотреба на службена положба и овластување“, предвидено и казниво по член 353 ст.3 и ст.1 од Кривичниот законик.

Пријавената Б.И. во својство на в.д. организациски директор на Јавна здравствена установа – Универзитетска клиника за токсикологија, пречекорувајќи ги своите службени овластувања во период од 14.02.2024 до 24.06.2024, а со намера да овозможи противправна имотна корист за 17 лица, на 15.05.2024 склучила 15 договори за дело со 15 лица кои биле работно ангажирани на Универзитетската клиника за токсикологија (и други лица без регулиран правен основ за нивно присуство на клиниката), по што, ретроактивно, за лицата наводно работно ангажирани, за месеците април и мај 2024 година издала два платни налози и извршила исплата на месечен надомест за наводниот работен ангажман во вкупен износ од 659 781 денари со вклучен персонален данок на доход“, објави МВР.

Констатирано е дека наведените исплати се извршени противправно, со што Бесија ја оштетила ЈЗУ Универзитетска клиника за токсикологија за вкупен износ на извршените исплати со платен данок во висина од околу 11.000 евра.

„Согласно наведеното, пријавената извршила службени дејствија кои што не смеела да ги изврши, односно Б.И. сторила кривично дело „злоупотреба на службена положба и овластување“ по чл.353 ст.3 вв.1 од КЗ, оштетувајќи ја Јавната здравствена установа Универзитетска клиника за токсикологија за износ 659 781 денари“, тврди министерството.