Кривичниот суд уште еднаш сака да појасни дека по однос на случајот Сашо Мијалков, односно предлогот за негов притвор, постапувал брзо и професионално, така што, според нив, немаат одговорност заради бегството на екс шефот на тајната полиција.

Тврдат и дека од нив не протекла информацијата за притворот на Мијалков.

Тоа Кривичен суд го направи преку соопштение до јавноста, објавено на нивната веб страница, откако ги направиле потребните интерни проверки.

„Во врска прашањата кои се наметнаа како дилема во јавноста, но и со намера Кривичниот суд Скопје да даде свој придонес во однос на евентуални пропусти на институциите, со цел утврдување на  причината за краткотрајната недостапност на органите на прогонот на обвинетиот С.М, ја информираме јавноста дека Кривичниот суд изврши интерни проверки по што е донесен следниот заклучок: Основниот Кривичен суд по однос поднесениот предлог за притвор постапувал итно, крајно професионално и стручно, донесувајки одлука во најкус можен временски период, со примена на мерки за обезбедување на целосна тајност во постапувањето.

Колку за потсетување, од поднесување на предлогот до изготвување на решението поминале севкупно три и половина часа, од 15 до 18:30 часот. Одлуката е донесена во недела (неработен ден) иако советот можел да одлучува и во понеделник до 15 часот, имајќи во предвид да рокот за одлучување е 24 часа. Судот тврди дека е невозмозно од судот да протекла информација дека е поднесен предлог за притвор против обвинетиот С.М. бидејки во критичниот период од 15 до 18:30 часот, сите што имале увид во предлогот имале взаемна визуелна контрола едни на други, со телефоните оставени на видливо место“, велат од Кривичен суд. 

Кривичниот суд останува посветен и отворен за соработка.

Истовремено,  Кривичниот суд Скопје ја информира јавноста дека објавата за пресудата по предметот во јавноста познат како „Таргет-Тврдина“ е закажана за утре 26.02.2021 година во 10 часот.