Ковачки и Шекеринска се препукуваат на Фејсбук: Имаше ли армијата национални обележја на свечената заклетва?
Полковникот Драган Ковачки, инаку член на ИК на ВМРО-ДПМНЕ, претпладнево објави статус на Фејсбук дека новопримените професионални членови на армијата дале свечена заклетва без национални обележја и симболи, по што министерката за внатрешни работи Радмила Шекеринска му возврати на социјалната мрежа нарекувајќи го „партиски војник“.
- Војниците немаат никакви симболи и обележја на себе. Добро погледнете ја сликата, немаат никакви лични обележја, немаат никакви амблеми на единицата, немаат обележја на Армијата и за крај најважно, немаат дури ни знаме на државата!
Според меѓународните конвенции, секоја официјална војска мора да има видливи обележја (амблеми) на припадност. Но, според сликата, нашите војници не припаѓаат во стандардот за регуларна војска.
Па дури и УЧК која беше паравоена формација, имаше сопствени амблеми и обележја во склад со меѓународните конвенции (!)., напиша меѓудругото Ковачки.
Шекеринска на несудениот технички министер за внатрешни работи му возврати дека ја дискредитира сопствената армија и објави фотографија дека на униформата на војниците сепак имало национален симбол.
- Партискиот војник пак удира по Армијата. Македонштината ја “браневте” со скинати униформи и сиромашна војска. Сега сте нервозни дека вистината за вашата неспособност и маргинализирање на Армијата излегоа на виделина: можело да има поголеми плати, можело да се обезбеди бенефициран стаж, можело да се обезбедат и нови униформи и нови чизми, но и спортска и воена опрема.
Пак не ви успеваат нападите на сопствените колеги и Армијата за која во вашите 11 години не направивте ама баш ништо, изреагира министерката.
Слично
Поврзани вести
