Добивме француски предлог со идеи за нашите јавно изнесени ставови во однос на спорот со Бугарија, вели премиерот Димитар Ковачевски. 

„Овој предлог, при чие изготвување се земени предвид нашите позиции и барања, ќе биде ставен на широк консултативен процес. Консултации во следните денови ќе се прават во Владата, со политичките партии, со претседателот на државата, Парламентот, како и со граѓанскиот сектор, експертската и севкупна јавност во земјата. По овие консултации ќе се донесе одлука во однос на предлогот“, наведува Ковачевски во објавата на Фејсбук.

Тој се заблагодари на францускиот претседател Емануел Макрон и Француското претседателство, за нивните напори да се надминат пречките и да се зачува европскиот кредибилитет на Балканот. 

Макрон изјави дека е најдено компромисно решение за спорот меѓу Бугарија и Северна Македонија.

Од ЕУ повикаа двете страни да го прифатат решението, со што Македонија ќе продолжи на патот кон ЕУ.