Спорното интервју на новинарот Драган Павловиќ Латас кај јутуберот Стефан Лазаров го нема на Youtube. 

Интервјуто е емитувано пред пет дена. Латас во еден дел раскажува за своето сексуално искуство со девојка која негов другар ја тепал и имала секс со повеќе луѓе во автомобил фиќо.  Настанот како што објасни се случил кога тој имал 14 години.  По пријава од полицијата денеска Јавното обвинителство соопшти дека е отворен предмет.

„До Основното јавно обвинителство Скопје доставено е известување од Секторот за компјутерски криминал при МВР за настанот. Надлежен јавен обвинител ќе даде насоки за натамошни дејствија и проверки“, стои во соопштението. 

Повеќе невладини организации, јавни личности и корисници на социјалните мрежи побараа државни органи да реагираат во врска со изјавите на новинарот и водител Драган Павловиќ – Латас дадени во поткаст за јутјуберот Стефан Лазаров, за кој тие сметаат дека содржи промоција на насилство врз жените, како и признание од Латас дека на 14-годишна возраст извршил силување на девојка.

Латас потоа објаснуваше дека не станува збор за силување и промоција на насилство, туку за обид за негова стигматизација. И Лазаров се правдаше.

Поради контраверзниот „разговор“ меѓу Латас и Лазаров голем број твитерџии објавија дека испратиле свои реакции до Јутуб, барајќи да се разгледа содржината и да се отстрани од платформата поради ширење на „насилство“. 

Повеќе политички партии побара одговорност за случајот. Во интервјуто Латас зборува за новинарството, периодот кога бил во војска, медиумите денес и слично.