Увид и избор на банката преку која ќе се кредитира набавката на нови автобуси, но и да го контролираат целиот процес за набавка на автобусите им нуди градоначалничката на Град Скопје, Данела Арсовска на советниците во град Скопје со цел побрзо да помине предлогот за набавка на автобуси за главниот град. 

Како што соопштуваат од кабинетот на Градоначалничката на Град Скопје, таа до советниците за седницата на Совет која се одржува денеска по 20ти пат доставила предлог одлука за набавка на нови еко автобуси нагласувајќи дека оваа одлука е доставена пред се „до советниците од ВМРО-ДПМНЕ, кои повеќе од две години не гласаат за нови автобуси иако имаат мнозинство во Советот на Град Скопје“.

- Бидејќи согласно закон градоначалник не може да донесе одлука за набавка на нови автобуси, единствена одговорност по повеќе од две години за недостатокот на автобуси во јавниот превоз имаат советниците од ВМРО-ДПМНЕ, кои се власт и мнозинство во Град Скопје и од кои зависи дали ќе има нови еко автобуси и подобар превоз. 

Со цел советниците од ВМРО ДПМНЕ да немаат оправдание за неносење на одлуката за нови еколошки автобуси, Градоначалничката на Скопје Данела Арсовска јавно континуирано им предлага да го контролираат целосно процесот односно банката која ќе го финансира проектот како и условите за набавка на еко автобуси да ги изберат самите советници во рамки на Советот, бидејќи оваа одлука единствено тие можат да ја донесат - се нагласува во соопштението испратено до медиумите.

Од оваа институција додаваат дека, како очигледна демонстрација на сила и самоволие, спротивно на деловникот и статутот, Претседателот на Совет Трајко Славески ниту на Советот закажан за 19.06.2024 година не ја стави точката за нови автобуси на дневен ред за гласање, иако поради недостаток на автобуси скопјани чекаат на автобуските станици, а новите автобуси ВМРО ДПМНЕ ги имаат ветено пред граѓаните на локалните избори во 2021. 

- За потсетување во претходниот мандат 2017-2021 година советниците на ВМРО ДПМНЕ гласале за набавка на еко автобуси на предлог на СДСМ, во истата форма како и сега и без никакви забелешки, бидејќи тогаш сметале дека треба да поддржат нови автобуси во интерес на граѓаните.

За потсетување претседателот на ВМРО ДПМНЕ Христијан Мицкоски и лично ги ветуваше новите автобуси за скопјани, за кои дури најави и дека преговара со компанија за набавка на 100 електрични автобуси, но до сега повеќе од 2,5 години тоа ветување не се реализира, како ни неговото ветување за вкупно 250 нови автобуси од програмата за Скопје која континуирано изјавува дека и лично ја поддржува - укажуваат од градот во нивното соопштение. 

Притоа додаваат дека досега според програмата требаше да се набавуваат секоја година по 50 автобуси за да се постигне квалитетот на превоз и услуги кои граѓаните ги заслужуваат и да се испорачаат до крај на мандатот 250 автобуси, и додаваа дека „советниците на ВМРО-ДПМНЕ повеќе од две години не ја гласаат одлуката“.