Се повеќе села ширум земјата се полупразни, во некои дури пак и речиси да нема жители. Причина-иселувањето и борба за егзистенција во поголемите градови.

Факт е дека светот оди напред а животот на село иако е поздрав и поубав реално изумира.

Се повеќе млади и семејства бегаат од селскиот начин на живот во потрага по подобра работа и поголеми примања, додека на село остануваат повозрасните кои преживуваат со просечна пензија и она што ќе го посеат и одгледаат. 

Токму враќањето од град во село почна да го промовира владеачката гарнитура која дава субвенции од 6 000 евра за обнова, или изградба на куќа, се нудат бенефиции за државно земјоделско земјиште, како и еднократна парична помош од 270.000 денари во тек на 18 месеци.  

Проектот пред се е наменет за лица кои претходно мигрирале од село кон град и се уште имаат имот на село, но и оние кои мигрирале од село во град и не го задржале имотот и невработените лица од град а мерката можат да ја користат лица кои претходно мигрирале од село во град, а се уште имаат имот на село, невработени кои живеат во град, но и вработени со ниски примања односно месечниот буџет во семејството  да не биде над 32.000 денари. 

Разни критики и пофалби како од граѓаните така и од партиите доби овој проект на Владата .

Се поставува прашањето: Колку е реално тоа и колкумина навистина би се вратиле да живеат на село, кога веќе навикнале на градските навики и брзо секојдневие?

Имајќи го предвид и фактот дека руралните средини и села кај нас не се толку развиени, бидејќи постојат села каде жителите буквално треба да патуваат до најблиското место или град да си купат леб и намирници надлежните би требало да се запрашаат како би опстојувале тие семејства таму?

Во моментов, близу 150 села се сосема празни, а во 300 има по 20-ина жители додека пак речиси една третина од населението во Македонија живее во скопскиот регион, што е за 10 пати повеќе во споредба со Вардарскиот, покажуваат демографските податоци од Државната статистика.

Кое е вашето мислење за оваа проблематика?