Три приватни компании лани за 172.206 дијализни третмани наплатиле 1,009 милијарди денари, а две јавни здравствени институции за 18.761 третман наплатиле 104 милиони денари.

Државниот Фонд за здравствена заштита платил 1,11 милијарди денари (18,05 милиони евра) за хемодијализа на околу 1.400 пациенти со бубрежни болести, покажуваат официјалните податоци што ги објави Фондот за здравствено осигурување во својот годишен извештај за 2016 година. Од тие средства 1 милијарда денари се исплатени на три приватни здравствени установи кои се даватели на вакви услуги. На две државни јавни здравствени установи лани за услги од ваков тип се исплатени 104 милиони денари што е помалку од 10 отсто од сите средства кои се платени за таа намена. Во однос на 2015 година, лани износот на исплати за вакви услуги на пет субјекти е зголемен за 1 милион евра.

Само за споредба, наспроти едната милијарда денари на трите приватни здравствени установи, истовремено лани државниот Фонд за здравствена заштита за услуги што ги даваат 114 јавни здравствени установи им исплаќа вкупно 13,86 милијарди денари. 
Споредено со другите здравствени услуги според обемот хемодијализата е една од најголемите ставки на расходната страна на буџетот на државниот фонд за здравство.   

Според податоците на државниот Фонд за здравствено осигурување 1.400 пациенти имале 200.579 третмани и еден пациент просечно за минатата година го чинел фондот 820.000 денари. 

Ова е цитат од извештајот на државниот Фонд за здравствено осигурување кој објаснува повеќе во врска со распределбата на услугите што ги даваат приватни фирми и јавни установи, а се плаќа со народни пари: „Хемодијализата (дијализен третман), како здравствена услуга од специјалистичко – консултативна здравствена заштита, осигурените лица со хронична бубрежна инсуфициенција ја остваруваат во две јавни здравствени установи (Универзитеска клиника за нефрологија и ГОБ “8 септември”) и три приватни здравствени установи (ПЗУ Центар за дијализа „Диамед - Македонија“- со 13 дијализни центри, ПЗУ Центар за дијализа „Систина нефроплус“ – Кавадарци - со 9 дијализни центри и ПЗУ Специјална болница за нефрологија и дијализа Диамед Скопје), со кои ФЗОМ има склучено договор за вршење на овој вид здравствени услуги. Во пакетот на здравствени услуги – хемодијализа, покрај хемодијализниот третман содржани се и задолжителните дијагностички испитувања, како и патните трошоци од местото на живеење до центарот за дијализа и обратно“ од страница 22 од извештајот. Целиот извештај може да го превземете на следниот линк.