Поранешната пратеничка од ВМРО-ДПМНЕ, Весна Дамчевска Илиевска, информира дека примила закани, поради барањето одговорност од раководството на партијата. 

Заканите таа ги пријавила во полиција.

Инаку, Дамчевска-Илиевска, како и други сегашни и поранешни функционери од ВМРО-ДПМНЕ, кои се здружија во Иницијативен одбор за вонреден конгрес, деновиве се погласно бараат оставка од партискиот лидер Христијан Мицкоски. Причина за тоа, според нив, е неуспехот на изборите, како и неговото предизборно ветување дека ќе си оди од кормилото на партијата ако таа не формира влада. 

„Агресивноста и заканите повеќе говорат за насилникот, отколку за жртвата. Знак на слабост и немање на вистински аргументи е испраќањето на разни ликови кои се закануваат и нарушуваат нечиј мир, не водејќи сметка за туѓите семејства. На Македонија и треба здрава опозиција која демократски комуницира и ги решава отворените прашања. Насилството мора да остане во минатото бидејќи ВМРО-ДПМНЕ може да оди напред само со отворена дебата и соочување на фактите. Да се бара одговорност од раководството и одржување на Вонреден Конгрес е демократски чин. Да се испраќаат разни ликови пред нечиј дом, да се пишуваат вулгарни зборови со говор на омраза, обвинувања без основа, лични навреди, на социјалните мрежи е кукавички и нечовечeн чин. Апелирам да престане безумието. Не е разумно тоа што го прават овие ликови, а уште понеразумно е тоа што некој помислил дека на тој начин може да се постигне нешто. Само се жртвуват луѓето за нечија суета. Да, пријавив закани и тормозење во полиција и ќе продолжам да пријавувам. Насилство нема да толерирам! Очекувам полицијата да постапи. Мене нема да ме заплашите, ниту ќе отстапам од својот став само дека на ВМРО-ДПМНЕ му е потребен вонреден Конгрес и промени“, пишува Дамчевска во своето соопштение до јавноста.