Владата на затворена седница го назначила Ванчо Ѓорѓиев, професор на Филозофскиот факултет во Скопје, за претседател на Комисијата за историски прашања со Бугарија.

Тој е роден на 19.04.1964 година во с. Ново Коњарево, Струмичко. Дипломирал на Институт за историја при филозофскиот факултет – Скопје (1989). Магистрирал на Филозофскиот факултет во Скопје на тема: „Петар Поп Арсов. Прилог кон македонското национално ослободително движење“. Докторирал во 2002 година на тема „Македонското револуционерно национално ослободително движење во Солунскиот вилает (1893-1903“. На Филозофскиот факулет во Скопје се вработил во 1992 година, како помлад асистент, во 1995 година е избран за асистент, во 2002 година е избран во доцент, во 2007 година за вонреден професор, а во 2012 за редовен професор.

Во меѓувреме во периодот 1996-2001 година, како надворешен соработник изведувал настава и на Воената академија „Генерал Михало Апостолски“. Во периодот 1999-2000 година бил потсекретар во Министерствто за образование на Република Македонија.

Како најдобар студент на генерацијата (1989) добитник е на „Манинговата награда“. Во 2004 година ја добива наградата „Гоце Делчев“ која се доделува како „општествено признание за особено значајни остварувања од интерес за Република Македониа од областа на науката“. Добитник е на повеќе благодарници и пофалници од граѓански здруженија во земјава и странство, како и од летни школи.

Бил член на повеќе организациски и издавачки одбори за одбележување на значајни јубилеи, годишнини и други научни собири; претседател на комисијата за историја за наставни програми при Бирото за образование на Р. Македонија; претседател на комисијата за матурски испити при Државниот испитен центар; член и главен уредник на редакцијата на списанието „Историја“; член на редакцијата на Годишниот зборник на Филозофскиот факултет – Скопје; член на мултидисциплинарната експертска комисија за историски и образовни прашања меѓу Р. Македонија и Р. Бугарија; раководител на Институт за историја во два мандати.

Аматерски се занимава со пчеларење и планинарење.

Истражувачи интереси:македонското револуционерно движење од крајот на XIX и почетокот на XX век; македонското прашање во политиката на балканските држави и големите сили; надворешните пропаганди во Македонија; економска и урбана историја.

Медимите вчера попладне објавија дека членови на Комисијата се и д-р Александар Литовски, научен соработник при Институтот за национална историја во Скопје, д-р Митко Панов, научен советник при Институтот за национална историја во Скопје, Д-р Никола Минов, вонреден професор на Филозофскиот факултет во Скопје при УКИМ – Скопје, Доц. д-р Сашо Додевски, насловен доцент избран на Филозофскиот факултет во Скопје, Д-р Бесник Емини, виш научен соработник на Институтот за духовно и културно наследство на Албанците – Скопје и д-р Димитар Љоровски, научен советник при Институтот за национална историја во Скопје

Проф. Ѓорѓиев доаѓа на местото на Драги Ѓоргиев, кој неколку години ја предводеше историската комисија.