Кампањата за локалните избори закажани за 15 октомври почнува на 25 септември. 

Државната изборна комисија денеска на седница го усвои роковникот за локалните избори за членови на советите на општините и на град Скопје, градоначалници на општините и на главниот град.

Јавниот увид во избирачкиот список почнува на 21-ви август и ќе трае до 9-ти септември. Рокот за собирање на потписи за листи на независните кандидати за советници и градоначалници е од 21-ви август до 4-ти септември. Политичките партии своите листи на кандидати треба да ги поднесат најдоцна до 9-ти септември.

На седницата усвоени се и барањата до МВР и до Министерството за информатичко општество за доставување на податоци кои се потребни за креирање на избирачкиот список, како и за пополнување на составот на изборните органи.

Локалните избори ќе се одржат на 15-ти октомври, а вториот круг би се одржал на 29-ти октомври.

Собранискиот претседател, Талат Џафери вчера точно напладне го потпиша решението за распишување на локалните избори. 

Toj апелираше до сите учесници да се однесуваат во согласност со Уставот и законските одредби, а институциите да обезбедат изборите да протечат во мирна, фер и демократска атмосфера како што заслужуваат граѓаните.