„ЌЕ СЕ ИЗБОРИМЕ ЗА ПОГОЛЕМА ФИНАНСИСКА СТАБИЛНОСТ НА ОПШТИНИТЕ ОД ЦЕНТРАЛНАТА ВЛАСТ!“ Ѓорѓиевски ќе се бори за поголеми права преку ЗЕЛС
Претседателот на ЗЕЛС и градоначалник на Општина Кисела ВОда, Орце Ѓорѓиевски, на неодамнешната седница на ЗЕЛС истакна дека ќе се бори за поголема финансиска стабилност на општините.
„Јас, како претседател на ЗЕЛС нема да дозволам некој да нѐ третира нас и нашите општини, а со тоа и нашите граѓани со потценување и нема да дозволам некој да си поигрува со нашите финансии на сметка на собирање на политички поени!
ЌЕ СЕ ИЗБОРИМЕ ЗА ПОГОЛЕМА ФИНАНСИСКА СТАБИЛНОСТ НА ОПШТИНИТЕ ОД ЦЕНТРАЛНАТА ВЛАСТ!
Денес се одржа четвртата седница на највисокото тело на ЗЕЛС, Генералното собрание.
Пред градоначалниците и претставниците од Комитетот на советите, информирав за активностите што се реализирани во минатата година и за постигнатите резултати, за евидентираните проблеми и планираните активности.
Енергетската криза, која периодов е еден од најголемите предизвици за секоја локална самоуправа.
И покрај трите состаноци со централната власт на највисоко ниво, вклучително и со Претседателот на Владата, наместо да се изнајде решение во корист на граѓаните, состојбата дополнително се влоши преку носење на два документа-изоставувањето на категоријата „улично осветлување“ од Тарифникот на новите цени на струјата и забраната од Владата до општините да формираат сопствени претпријатија за менаџирање со јавното осветлување.
За првото, ЗЕЛС лобираше за враќање на оваа категорија во Тарифникот или за итно донесување на измени во Законот за комунални такси.
Иако Министерството за финансии констатира дека е потребно да се направат законските измени, од таму до ден денес нема никакви поместувања.
Предлозите од централната власт беа во насока, општините сами, преку советите да ја утврдат висината на оваа такса, што е апсолутно неприфатливо и поради тоа, ЗЕЛС испрати предлог до Министерството за финансии, цената на уличното осветлување да се пресметува со просечната цена на високата и ниската тарифа за мал потрошувач, зголемен за коефициентот LV 1.1.
Во однос на владината забрана општините да формираат сопствени претпријатија за менаџирање со јавното осветлување, а оние општини што основале вакви претпријатија да ги укинат, ЗЕЛС покрена иницијатива до Уставниот суд за преиспитување на уставноста и законитоста на одлуката, со утврдување на предлог за донесување на времена мерка со која ќе се запре примената на истата.
За жал, минатата недела стигна Решението од оваа највисока судска инстанца со кое оваа иницијатива беше отфрлена, со што општините повторно се доведоа до финансиски подредена состојба.
Пред делегатите проговорив и за давањето можност на општините да формираат претпријатија за обезбедување на електрична енергија од обновливи извори.
Потенцирав дека сите локални самоуправи ќе мора да посветат внимание на изнаоѓањето на начини за обезбедување на средства за оваа намена од европски проекти или други извори за финансирање, затоа што не се знае како понатаму ќе се одвива состојбата со енергетската криза.
Како позитивна можам да ја издвојам вонредната мерка со која основните и средните училишта, како и јавните претпријатија за снабдување со вода беа префрлени на регулиран пазар.
Лобирањето на ЗЕЛС, во следниот период ќе биде насочено кон тоа училиштата да не се третираат како профитни организации бидејќи е неприфатливо да се плаќа по тарифа како за стопанственици и дека е задоволен што за ова ЗЕЛС има поддршка и од УНИЦЕФ.
Во контекст на Министерството за образование и наука кое заедно со УНИЦЕФ ја работи новата предлог –методологија за распределба на блок дотациите за основно образование, јасно укажав дека ставот на ЗЕЛС кој е испратен и до МОН, е дека е неопходно зголемување на блок дотациите за образование, бидејќи има општини кои 95 % па и 97% од овие средства ги трошат за плата на вработените, а сето останато го покриваат од свои средства.
На Генералното собрание се продискутира и за состојбата со противпожарните единици и малите средства кои општините ги поседуваат за оваа намена.
За остварената средба со министерката за животна средина и просторно планирање и за чекорите што ќе се преземаат за искористување на средствата од двата заема на државата од Светска Банка и од Европска банка за обнова и развој.
Информирав и за ревидираниот документ за систематизираните ставови на ЗЕЛС, во кој се потврдува дека се потребни поголеми финансиски средства од централната власт за соодветно остварување на приоритетите на ЗЕЛС: обезбедување на поголема финансиска стабилност, реформи во организацијата на локалната власт и префрлање на нови надлежности.
На крајот, лоцирани се повеќето аномалии кои го оневозможуваат развојот на општините и кои бараат итно унапредување на методологијата за правично насочување на средствата од централно на локално ниво во согласност со европските практики и обезбедување на еднаков третман на општинската во однос на државната даночна администрација.
Промените не се веќе потреба, туку неопходност!
Како Претседател на ЗЕЛС нема да дозволам финансиите на граѓаните да бидат управувани во насока на нечиј политички маркетинг.
Ние мора заедно да се бориме за нашите права и заедно да направие промена во нашите општини.
Ситуцијата не е лесна, напротив, пред нас има големи препреки, но заедно сме во ова и ќе успееме!“, истакна тој.
Слично
Поврзани вести
