Градоначалникот на општина Центар, Скопје, Горан Герасимовски објави дека инспекторите на општината изминатиов период изрекле четири казни за градење во општината кои незаконски зафаќале и јавна површина. 

- Четири градилишта во општина Центар се казнети поради незаконско зафаќање јавни површини и загрозување на безбедноста на пешаците и сообраќајот - објави Герасимовски на својот Фејсбук профил. 

Воедно од општината посочуваат дека казнетите компании на јавни површини оставале градежен шут и материјал што претставува опасност за движењето на пешаците и одвивањето на сообраќајот.

Како што информираат од локалната самоуправа, во рамки на редовните инспекциски контроли, општинските инспектори изготвиле записници и издале прекршочни налози за градилишта на улиците „Златко Шнајдер“, „9 Мај“, „Дебарца“ и „Васил Стефановски“. Паричните санкции за овие прекршоци изнесуваат од 1.300 до 1.800 евра.

- Редовно ја следиме состојбата на сите активни градилишта во Општина Центар. Нулта толеранција ќе има за сите што ги прекршуваат законите и го нарушуваат јавниот простор - рече градоначалникот Горан Герасимовски и порача дека надзорите на градилиштата продолжуваат со несмален интензитет како континуирана мерка за одржување на чист и функционален урбан простор.