Уште еден камион денеска којзнае по кој пат пропадна на плоштадот „Македонија“ во центарот на Скопје во делот каде се наоѓа партерната фонтана и го оштетил плочникот со предницата.

Јавното претпријатие „Градски паркинг“ – „пајак“ интервенираше во излегувањето на камионот, а од Град Скопје велат дека станува збор за фирма која неовластено со камионот влегла на плоштадот и го оштетила плочникот.

„Градот Скопје остро го осудува овој чин, ќе ги преземе сите законски мерки за извршување на инспекциски надзор како и за санкционирање, по што за причинетата штета врз јавните добра на плоштадот ќе се бара надомест на штета“, гласи објаснувањето од градската управа.

Од таму додаваат дека однесувањето на поединци е недозволиво и за истото ќе се спроведат најстроги санкции.